Ons is vas geparkeer, maar gelukkig is die Acacia Overland trok ook haastig en ons is net na 7am op pad. Vandag is dit heeldag op die pad, ons hoop om Motopi teen vanaand te bereik. Die eerste ding wat ek agtergekom het,wat agter gebly het in Pretoria is my voorskoot. Ek is nogal ‘n kompulsiewe voorskoot draer, en die soektog na ‘n voorskoot begin.
Pieter stel voor ons luister na een van die preke wat hy afgelaai het van die internet. Ek kies vir Charl van Rooy.
Ons stop op Serowe vir airtime, ek draf gou by die Pep en Spar in vir ‘n voorskoot (kry niks nie) gelukkig kry ek vir Engela pantoffels by Pep. Toe is ons weer vort. Ons ry by die Mopipi panne verby en ek neem foto’s sommer so in die ry. Net na 3 uur besluit Pieter dis tyd vir ‘n aanddiens en ons luister na nog ‘n preek.
Net na 4 ry Pieter amper ‘n kalf raak wat uit die bosse gespring het en voor die trok ingehardloop het, ons mis die kalf rakelings, maar ongelukkig het die kalf sy been gebreek. Ons kry nie die eienaar nie, daar is niks wat ons vir die kalf kan doen nie en ry dus maar aan.
Voor sononder is ons op Motopi en ontmoet uiteindelik vir Oom Thys en Tannie Dorette Cronje en Simeon. Hulle het ook besoek van ouderling Louis Kruger en Ds Gerhard van Rhyn van Gereformeerde Kerk Rietvallei. Toe ons by die hek inry is Emke se eerste woorde: "Kyk hulle het honde". Emke is dol oor honde.
 |
| Piekniek langs die A14 |
 |
| Mopipi panne |
Motopi is ‘n dorpie so 80km voor Maun op die walle van die Botetirivier.
No comments:
Post a Comment