Dag 9, Sondag, 30 Junie 2013 – Rundu en Tsumeb.

Na ontbyt pak ons op, om weer Rundu toe gaan. Hierdie was ons goedkoopste kampering op die vakansie ND134. Net ek en Pieter betaal elk ND 60, koop ‘n kaart vir ND10 en 2 bondeltjies hout teen ND4.  Dis nou Sondag en ons verwag die dorp sal stiller wees as gister. Vandag gaan ons kyk of die huis waar ons gebly het nog staan.

Ons was reg, die dorp is stiller as gister. Ons beweeg weg van die nuwe hoofstraat af tot by die Laerskool Noordgrens. Die skool lyk nog vir my min of meer dieselfde, die poskantoor is ook nog op dieselfde plek. Radio Kavango is nou die  Namibia Broadcasting Corporation wat ook min of meer onveranderd is.

Hier was ek vir 3 jaar op skool terwyl my Pa hier in die weermag was

 Die swembad is nou leeg en verwaarloos. Ons draai links by die poskantoor. Aan die regterkant was altyd ‘n park met ‘n kameelperd in, die het nou ‘n kerkgebou gekry.

Die straat waarin ons gebly het is nogsteeds nie geteer nie en die huis staan nog. Die tuin is heeltemal anders en toegegroei. Ongelooflik wat 30 jaar aan ‘n tuin kan doen.

Ons vorige huis

 Die bomskuiling in die agtertuin staan nog, ek het vergeet daar was ‘n gastekamer aan die kant van die huis. Daar is nog dieselfde ranker op die draad in die voortuin.

Oorblyfsels van ons bomskuiling

Ons ry verder deur die dorp verby die huis van die Nelle (of is dit Nels?)  In die rigting vd watertoring. Die area waar die karavane was, is toegebou onder die huise. Ons draai weer terug rivier toe en kom by die sportvelde uit, dit  is erg verwaarloos maar daar speel ‘n klompie mense sokker. Die pad wat verby die Voortrekkers se gronde geloop het, loop dood teen die agterkant vd gebou wat Rundu se ontspanningsklub was. Die saal waar ons ballet gedoen het, het in onbruik verval. Ek is bly dat ek Rundu weer besoek het, dis jammer dat alles so veral het, maar soos Pieter sê daar is niks wat die dorp aan die gang hou nie, geen landbou of een of ander groot industrie nie. Ek dink die ontrekking van die weermag met onafhanklikheidswording was die doodslag van die dorp.

Omdat ons weer deur ‘n "vet fence"( vet soos in veeart in engels en nie dik nie) moet gaan, besluit ek om vir eers nie nog vleis te koop nie. Dit is ook by die "vet fence" wat hulle aan boord kom om ons yskas en vrieskas te inspekteer. Alles is reg. Ek bly verbaas hoeveel van die mense Afrikaans praat. Die B8 tussen Rundu en Grootfontein is ‘n baie goeie pad. Ons mik om op Tsumeb te slaap – daar is ‘n munisipale kampeerplek. Maar eers gaan ons ‘n draai maak by die Hoba meteoriet. Dis so 20km uit ons pad uit, maar waneer kom ons weer hier verby???

Die hele uitstalling by die Meteoriet is baie mooi – dis ‘n nasionale gedenkwaardigheid en word baie mooi instandgehou.

Kyk, die magneet plak. Die meteoriet is omtrent 80% yster

Daarna is ons Tsumeb toe. Die karavaanpark laat my dink aan ‘n Aventura oord, hier is ‘n Dros op die perseel. Raai wie eet uit vanaand?